រឿង មនុស្សលោក

     

       កាលពីព្រេងនាយមានកុមារីម្នាក់អាយុ ១៤ឆ្នាំម្តាយប្រើទៅអោយជីកដម្លូង។ ក្មេងនោះរៀបចបរួចស្រេចចេញដើរ​ទៅរកដម្លូង ទៅដល់ព្រៃធំមានដម្បូកមួយមានរូងជ្រៅ។ កុមារីនោះទៅជីកដម្លូងនៅជើងតម្បូកនោះរបូតផ្លែចបជ្រុះធ្លាក់​ទៅក្នុងរូងនោះ។ នាងនោះមិនដឹងធ្វើដូចម្តេចក៏ស្រែកប្រកាសថា «លោកណាជួយយកផ្លែចបអោយខ្ញុំបាន ខ្ញុំនឹងសងគុណ លោក»​។ ស្រែកតែប៉ុណ្ណោះ មានខ្លាចាស់មួយ ដំបៅក្បាលរុយបែងដង្កូវចុះគគ្រិច ចេញមកពីក្នុងព្រៃប្រាប់ទៅនាងនោះថា «នាង! តាយកអោយបានផ្លែចបនោះ តែបើតាយកបានគ្រាន់តែនាង​ឯងរកចៃអោយបានហើយតាមិនចាំបាច់យកគុណ​ពីចៅទេ»។

      នាងឮខ្លាថាដូច្នោះ ក៏និយាយថា «ឱលោកតាអើយ! អោយតែលោកតាជួយយកអោយបានចុះ »។ ខ្លានោះយក ផ្លែចបបានពីក្នុងរូងអោយទៅនាងនោះ ហើយអោយនាងនោះរកចៃអោយ។ នាងនោះក៏យកបន្លាមកឆ្កិះដង្កូវនៅដំបៅ ក្បាលខ្លានោះ ។ ខ្លានោះចេះតែសួរនាងថា «នាងដំបៅតាស្អុយបឬក្រអូប? » ដំបៅនោះស្អុយណាស់ ប៉ុនែ្តនាងនោះឆ្លើយ​ទៅវិញថា « ក្រអូបណាស់លោកតា ។ ខ្លានោះចេះតែសួរនាងចេះតែថាក្រអូប ។ លុះឆ្កិះដង្កូវអស់ទៅ ខ្លានោះបាត់ឈឺបាត់ រមាស់ ហើយនិយាយប្រាប់នាងនោះថា នាង! យកជាលមួយមក តានឹងដាក់ដម្លូងអោយ​ » ។ នាងនោះយកជាលមួយមក អោយខ្លាៗ ដាក់សុទ្ឋតែមាសប្រាក់ពេញជាលនោះ ចងមាត់ជាលជាប់ អោយទៅនាងនោះរួចប្រាប់នាងថា «នាង! នាង យកជាលនេះទៅផ្ទះហៅបងប្អូនមកជុំបិទទ្វារអោយជិតសឹមបើក ។ នាងនោះលាខ្លាដើរទៅដល់ផ្ទះ ហៅបងប្អូនមកជុំ រួចក៏បើកជាលនោះ ដល់បើកទៅបានសុទ្ឋតែមាសនិងប្រាក់ចាយគ្នា ។

  

      លុះយូរបន្តិចដឹងទៅដល់ស្រីឯទៀត ដែលមាន កូនក្រមុំស្រីនោះបញ្ឆោតកូនក្រមុំថា « ហងឯង

មើលកូនគេ ៗ ទៅជីកដម្លូងបានមាសប្រាក់យកមកចែកបងប្អូនគេ ហង ទៅជីកដម្លូងបានតែដម្លូងគ្មានបានខ្មោចអ្វីទេ » ។ ថ្ងៃក្រោយស្រីនោះអោយកូនទៅជីកដម្លូងដូចនាងនោះទៀត លុះទៅ ដល់បានជួបប្រទះនឹងខ្លាមុននោះទៀត ក៏ធ្វើជាជ្រុះចបដូចនាងមុនហើយថា « លោកណាយកចបអោយខ្ញុំ ៗ នឹងសង​គុណលោក ។ ខ្លានោះឮហើយក៏មកយកអោយ រួចអោយនាងនោះចាប់ដង្កូវអោយ ។ ខ្លាសួរដូចពីមុនថា « នាង! ដំបៅតា ស្អុយឬក្រអូប? » ។

    

     នាងនោះឆ្លើយថា « ស្អុយណាស់ ។ ខ្លាឮដូច្នោះ នាងយកជាលមួយមក តានឹងដាក់មាស​ប្រាក់អោយ «នាងយកជាលអោយខ្លា ៗ ចាប់សុទ្ឋតែពស់វែកដាក់ពេញជាលហើយអោយទៅនាងនោះប្រាប់​ថា​ « នាងយកទៅផ្ទះហៅបងប្អូនមកជុំបិទទ្វារអោយជិត សឹមបើក « នាងនោះទៅដល់ផ្ទះហើយប្រាប់ម្តាយ ម្តាយ​អរណាស់អោយបងប្អូនមកជុំបិទទ្វារបើកជាលមើល ពស់វែកចេញមកចឹកមនុស្សទាំងអស់នោះស្លាប់ទៅ៕

ចចើងចង់លោភរែងបាត់ធនទៅ